एआरटीओ राजेंद्र केसकर निलंबित : भ्रष्टाचार प्रकरणात राज्य सरकारची कडक कारवाई
गोंदिया, 5 मे 2026 — गोंदिया येथील सहायक प्रादेशिक परिवहन अधिकारी (एआरटीओ) राजेंद्र सदाशिव केसकर यांच्यावर गंभीर भ्रष्टाचाराचे आरोप सिद्ध झाल्यानंतर महाराष्ट्र शासनाने त्यांना तात्काळ प्रभावाने निलंबित केले आहे. या संदर्भातील अधिकृत आदेश गृह विभागामार्फत जारी करण्यात आला असून, या कारवाईमुळे परिवहन विभागात मोठी खळबळ उडाली आहे.
मिळालेल्या माहितीनुसार, नागपूर येथील लाचलुचपत प्रतिबंधक विभागाच्या (एसीबी) अहवालाच्या आधारे ही कारवाई करण्यात आली आहे. केसकर यांनी एका खासगी व्यक्तीच्या माध्यमातून तक्रारदाराकडून सुमारे ७० हजार रुपयांची लाच मागितल्याचा आरोप आहे. या तक्रारीची दखल घेत एसीबीच्या पथकाने सापळा रचून त्यांना ताब्यात घेतले होते.
या प्रकरणात ५ डिसेंबर २०२५ रोजी गोंदिया ग्रामीण पोलीस ठाण्यात भ्रष्टाचार प्रतिबंधक कायद्यांतर्गत गुन्हा नोंदविण्यात आला होता. पुढील तपासादरम्यान केसकर यांना अटक करण्यात आली होती. तसेच, त्यांच्या पुणे येथील निवासस्थानी घेण्यात आलेल्या झडतीत कोट्यवधी रुपयांची अपसंपत्ती आढळून आल्याची माहिती समोर आली आहे, ज्यामुळे प्रकरणाची गंभीरता आणखी वाढली आहे.
सध्या या प्रकरणाचा सखोल तपास सुरू असून, संबंधित आर्थिक व्यवहारांची चौकशीही सुरू आहे. प्रकरणाचे गांभीर्य लक्षात घेऊन महाराष्ट्र नागरी सेवा (शिस्त व अपील) नियम, १९७९ मधील नियम ४ अंतर्गत केसकर यांना निलंबित करण्याचा निर्णय शासनाने घेतला आहे.
शासन आदेशानुसार, निलंबन कालावधीत केसकर यांना नियमानुसार निर्वाह भत्ता आणि महागाई भत्ता देण्यात येणार आहे. तसेच, निलंबन काळात त्यांचे मुख्यालय मुंबई येथील परिवहन आयुक्त कार्यालय निश्चित करण्यात आले असून, संबंधित अधिकाऱ्यांची पूर्वपरवानगी घेतल्याशिवाय मुख्यालय सोडण्यास मनाई करण्यात आली आहे.
हा निलंबन आदेश २९ एप्रिल २०२६ पासून लागू करण्यात आला असून, तो शासनाच्या अधिकृत संकेतस्थळावरही उपलब्ध करण्यात आला आहे. या कारवाईमुळे राज्य सरकारची भ्रष्टाचाराविरोधातील शून्य सहनशीलतेची भूमिका पुन्हा अधोरेखित झाली असून, संबंधित विभागांमध्येही सतर्कतेचा इशारा दिला गेला आहे.
यह भी पढ़ें
